Nema hvað...

Strákarnir okkar

2006-07-20T23:50:00.000Z

Ok strákurinn "okkar" er að meika það. Sat spennt við sjónvarpið kl. 24:00 að bíða eftir því hvort Magni myndi nokkuð detta út.

Þessar elskur hafa góðan smekk og báðu Magna að taka lagið aftur. Þá kom hið furðulega séríslenska stolt í ljós. Magni minn var að meika´ða. Flestir Íslendingar virðast þjást af þessu stolti þessa dagana. Ef þú kveikir á sjónvarpinu þá eru tónlistarmyndbönd með honum, hvar sem þú ferð... ,,sástu Magna í gær"

Ég er þar af leiðandi farin að spara fyrir Magna-stílabókunum næsta ár og dagatalinu af strákunum okkar (handboltinn, jú sí við unnum sko Svía).

Hvernig á að haga sér í sumarfríi?

2006-07-19T04:17:00.000Z

Eftir mikla rannsóknarvinnu og heilmikið þankastríð hef ég komist að eftirfarandi niðurstöðu um "rétta" hegðun í sumarfríi.

Kvartaðu undan veðrinu: Þetta virðist vera mjög mikilvægur eiginleiki að tileinka sér núna í sumar, allir stynja með samúð þegar einhver kvartar undan að sumarið ætli bara ekki að koma (mér gæti reyndar ekki verið meira sama, hef ávallt verið innipúki og brenn undan gula kvikindinu svo það má alveg sleppa því að skína).
Farðu snemma á fætur: Morgunstund gefur gull í mund virðist vera mottóið sem blivar í sumarfríi (ekki það að úti sé rigning og læti sem maður hættir sér engan veginn út í og allir hanga inni, þá á maður að fara snemma á fætur ekki "sóa" deginum, berst reyndar sjálf hatrammlega á móti þessu, sef þegar ég er þreytt og hananú!).
Farðu í ferðalag: Skítt með að tjaldið rifni upp með rótum og fjúki í burtu og bensínið svo hátt að fara 3 km kostar hátt í 1000 kall, í ferðalag skalltu fara líkt og sannur Íslendingur (berst líka á móti þessu, fer bara öðru hvoru vestur og sef í rúminu mínu).
Hreyfðu þig: allir verða að skokka á sumrin, það er bara svoleiðis, nú og svo nýjasta æðið að ganga á fjöll (ég keyri yfir Vatnsskarðið, minnir mig, þegar ég fer vestur fer þá á fjöll, reyndar eru göngutúrar bara ágætisskemmtun).
Kvartaðu pínu meira yfir veðrinu: afhverju ættum við svo sem að hætta því sem við erum svo góð í, við útskýrum allt með veðrinu.... ,,æj ég er svo þreytt og löt, það er rigning úti", ,, æj ég er svo þreytt og löt, það er svo heitt og svo mikil molla"

Niðurstöður: Gerðu það sem þú vilt skítt með hvernig þú ættir að haga þér, common þetta er nú einu sinni sumarfríið þitt!!

Að byrja að skrifa á ný..

2006-07-18T17:53:00.000Z

Ok ég er búin að vera í örlítið löngu "blogg-fríi". Átti nú reyndar bara að vera sirka 2-3 vikur en það lengdist. En svo kom pressan, þegar maður fer í svona langt frí og byrjar að skrifa aftur hvað þá? Þarf það ekki að vera alveg með eindæmum gáfulegt og flott. Mjög svo djúpar pælingar og þar frameftir götunum.

Eða er þetta bara spurning um að setjast niður og skrifa, það hvort eð er ekki líklegt að margir lesi þetta þannig við skulum frekar telja þetta eitthvað gert fyrir mig.

Pælingarnar og gáfulegheitin láta a.m.k. á sér standa, heilinn kominn í sumarfrí og engar pælingar í gangi. Nema þá hvað skal gera í sumarfríi.

Að vera í sumarfríi er nefnilega alveg nýtt fyrir mér, hélt að ég myndi ekki halda það út en sá svo að slíkt er bara hið besta mál og gjörsamlega nauðsynlegt. Gæti skrifað eins og einn pistil um hvernig best er að haga sér í sumarfríi, fyrir aðra grunlausa sumarleyfishafa sem vita ekki hvernig á að haga sér.

En ekki hægt að segja annað en að þetta hafi verið bæri gáfulegt og djúpt hjá mér þegar uppi var staðið :)

Lakkrísbindi og mokkasíur....

2005-11-09T01:28:00.000Z

Jæja maður er að klára skólann loksins í vor (fingers og toes krossed í allar áttir). Nema hvað þegar sá tími líður þá hlýtur samkvæmt öllum náttúrulögmálum að koma að einhverjum öðrum merkisafmælum.

Líkt og það sem er að smella á núna. Mér til mikillar hrellingar fékk ég upphringingu um daginn þar sem mér var tjáð að nú væri það skollið á að ég væri 15 ára gagnfræðingur. Reyndar í bland við aðra upphringingu frá "Mál og menningu um að styðja þá sem eiga bágt um 8 þúsund og þegar ég neitaði var ég sökuð um að vera skítt sama um alla þá sem eiga bágt!! (takk Einar) ;)

Mér sem fannst eins og í gær sem að ég var að dást að nýju gulu peysunni minni, þröngu grænu stredds buxunum og gulu mokkasíunum í stíl til að setja punktinn yfir i-ið.

Já ekki laust við að maður eigi svona eins og eina eða tvær skemmtilegar minningar frá þessum blessuðu barnaskólaárum.

..upp undir Eiríksjökli ..da ra

2005-09-03T01:01:00.000Z

Jæja eða Tungnafellsjökli hver svo sem er munurinn.

Ég er sumsé komin af fjöllum, reyndar meira að segja smá tími síðan.
Þetta var alveg dásamlegt út í eitt og maður orðinn agalega náttúrulega sinnaður og allt það.

Sá það fljótlega hvað maður þarf ekki á öllu þessu drasli sem maður er alltaf með í kringum sig að halda. Fyrir utan heita sturtu með stöðugum hita. Heit sturta er eitt af vanmetnastu lífsgæðunum sem við höfum í dag.

Að öðru leyti er ég náttúrulega alltaf á leiðinni að skrifa meira... það eru bara svo allt of fáir klukkutímar í sólarhringnum.

Útlegð?

2005-06-20T17:00:00.000Z

23. mars

Jú setur að manni hljóðan og ég sem hélt ég væri svo dugleg.

Ef ég lofa að vera voðalega dugleg næsta haust kem ég þá til með að halda þessum 2-3 sálum sem nenna að glugga í bloggið mitt öðru hvoru?

Núna þessa dagana er ég að nýta allt það sem nútímaþægindi bjóða upp á. Horfi á sjónvarp, vídeó, dvd og eitthvað í tölvunni, ég rista mér brauðsneið á meðan hamborgarinn snarkar á eldavélinni og brauðið velgist í örbylgjunni.

Mín er nefnilega á leið í Nýjadal og ætlar að eyða sumri sínu þar sem skálavörður. Þar eru engin nútímaþægindi aðeins olíueldavél til að hita vatn.

Nýidalur (ekki með joð) er á sprengisandi svona nokk á miðju Íslandi. Ef þú finnur kort af Íslandi sem á er rauður depill og segir: you're nowhere býst ég við að þá munt þú finna þig á stað er kallast Nýidalur.

Svo eftir sumarið mun ég væntanlega verða hinn mesti náttúruunnandi og njóta fábreytileika lífsins og allt það sem þessir náttúruunnendur gera. Byrja víst að stunda jóga og gerist grænmetisæta. Note to self * muna að kaupa paint by numbers málverk (landslag). Svo ég komi nú niður af fjöllum með málverk og uppfull af ljóðum um náttúruna.

Eina sem mér dettur þó í hug núna þessa dagana er hann Tómas Guðmundsson vinur minn
Urð og grjót
Upp í mót
Ekkert nema urð og grjót..

kannski á þetta svosem vel við, sérstaklega lokaorðin (einhvers staðar í miðju ljóðsins)
Lofa því að fara aldrei aftur...

Kemur í ljós, set inn helling í haust af skemmtilegum útilegumyndum og frásögnum af rugluðu hálandafólki :-)

.... á gervihnattajörð

2005-03-24T20:01:00.000Z

Uppskrift að fullkomnu lífi?

Fyrst sæki ég um að komast að í þættinum You are what you eat og kemst þá að því að matarræðið er snarbilað, en eftir að kellingin fer þá held ég samt bara áfram að éta og fitna meira.
Þá fer ég í megrunarkeppnina The Biggest Loser og næ af mér nokkrum kílóum.
Nú til að fá final touchið á þetta þá fer ég í The Swan og fer í nokkrar lýtaaðgerðir og fitusog, ekki veitir af.. en í lokaþættinum þá kemst ég ekki áfram í fegurðarsamkeppni the Swan, þannig að þetta hefur ekki virkað alveg.
Þá fer ég í Extreme Makeover og læt taka mig ærlega í gegn, skipti bara um andlit og sýg alla fitu úr líkamanum.
Þá er ég heldur betur orðin flott og fer í Americas Next Top Model þáttinn og geri gott þar.. en tapa.
Nú er ég orðin soldið fúl og einmana, á engan kall nebblega. Best að fara í Bachelorette og ná mér í einn ríkan og myndarlegan.
Geri það, en þegar þáttaröðin og það er búið, vantar einhverja spennu í sambandið, þannig að við förum í Temptation Island... en þar endar það með að við hættum saman því við héldum bæði framhjá.
Þá langar mig bara að vera dáldið sjálfstæð og verða rík.. Þannig að ég fer í Survivor, þrauka alveg í 36 daga en lendi í 3. sæti ohhh ég fæ ekki einu sinni 100 þús dollara.. fer heim, alveg í rusli.
En ég er ennþá sæt eftir lýtaaðgerðirnar og sílíkonbrjóstin hanga ennþá uppi.. og þar sem mig langar aftur í kærasta, þá skrái ég mig í Djúpu laugina.. næ mér þar í einhvern lúða sem býr í ljótri íbúð í Fellunum og er frekar subbulegur.
En það er allt í lagi, ég hringi bara í vini mína í Queer eye for the Straight Guy og þeir koma og henda manninum mínum í klippingu og kaupa ný föt á hann, rí-dekkorreita svo íbúðina, allt voða flott og hann biður mig um að giftast sér í lok þáttarins, sem ég geri.
Við förum þá auðvitað með brúðkaupið í Brúðkaupsþáttinn Já og vinnum svo ferð í Karabíska hafið, voða rómó.
En á skemmtiferðaskipinu þá verð ég ólétt.. eignast svo krakka og eftir 2 ár er hann farinn að stjórna öllu, þannig að ég hringi í The Nanny og fæ hana til að kenna okkur að ala upp krakkann og láta hann ekki ráða öllu.
Nú er allt komið í drasl aftur.. Þannig að ég hringi bara í Heiðar vin minn Snyrti og fæ hann að koma með þáttinn Allt í drasli og taka til... vá hvað það verður allt fínt hjá okkur!
Þá er nú kominn tími til að hringja í Völu og við komum í Innlit Útlit, en við þurfum svo að stækka við okkur því að það er annað barn á leiðinni, þannig að við förum bara með íbúðina í þáttinn Allt undir einu þaki, seljum hana og kaupum stærri.
Árin líða og þetta endar allt með því að ég er búin að skilja við kallinn sem hélt framhjá mér, lýtaaðgerðirnar sem voru gerðar fyrir 15 árum komnar í klessu, ég er ljót, feit, einstæð 2ja barna móðir sem á ekki neitt.. þannig að ég fer bara í Fólk með Sirrý og væli yfir þessu öllu saman!

Rauðvín og líkþornaplástur

2005-03-07T23:52:00.000Z

Jæja haldiði að lukkan sé ekki að snúast mér svona all svakalega í hag.
Nema hvað ég er núna í rauðvínsklúbbi í skólanum. Þar vann ég í fyrstu tveimur útdráttunum. Það var farið að þykkna verulega í fólki... sérstaklega í ljósi þess að ég drekk ekki rauðvín ; )
Jæja nú líður og bíður og það sjatnar fýlan í fólki (þetta var nefnilega orðin hin argasta fýla hjá sumum) nú á laugardaginn er svo bingó, og haldiði að stelpan (ég) hafi ekki unnið tvisvar sinnum bingó.

Þá heyrðist gargað nei... úr mörgum hornum, grín hjá sumum, öðrum ekki. Mér var reyndar snögglega bent á að fara að versla mér Lottó miða.
Hver veit nema að maður verði bara orðinn milli eftir smá tíma.
Jæja en hinir stórkostlegu vinningar mínir, sem fólk var orðið svo neikvætt út í voru, alkaseltzer og líkþornaplástur, og hins vegar fékk ég aukaverðlaun sem var snittubrauð.

Já það er margt sem fólk er afbrýðsamt út í.

og svo liðu áramótin...

2005-01-29T06:14:00.000Z

... og janúar líka ef því er að skipta. Það er ótrúlegt hvað tíminn líður þegar maður hefur mikið að gera. Núna er ég að duglegast endalaust í skólanum, það er alltaf verið að bæta á mig vinnu í skólanum (sem er svosem ágætt þar sem þetta er í stærðfræði). Núna í vor er ég með extra mikið af einingum, þ.e. 16e sem er rúmlega fullur skóli þannig það væri ágætt ef einhver hefði til sölu svona eins og 3-4 tíma aukalega í hvern sólarhring. Reyndar er þetta fínt, kemur reglu á mann svo maður er farinn að standast eitthvað af þessum blessuðu áramótaheitum. Sérstaklega þau að sofa reglulegar, þeir sem þekkja mig erhm kannast kannski við nokkrar næturvökur. Hins vegar er það orðinn hinn póllinn núna, ég fer á fætur um 5 og læri og er voða dugleg... Húrra fyrir mér.... í bili amk.

Þannig niðurstaðan er sumsé sú að það er vitlaust að gera hjá mér þessa dagana, og verður næstu mánuði líka. Flott er þá leiðist manni ekki á meðan!!

Gleðileg jól

2004-12-23T16:54:00.000Z

Jæja öll mín kæru kæru. Efalaust hef ég nú gleymt að skrifa einhverjum jólakort. Á því biðst ég að sjálfsögðu afsökunar og lofa betrun og bótum fyrir næstu jól.

Mín ósk til ykkar er að þið eigið gleðileg jól. Að jólastressið fari ekki með ykkur og munið að jólin koma þó það sé ekki búið að þrífa gardínurnar.
Jólakveðjur Guðfinna

Fyrsta þraut dagsins

2004-12-10T16:39:00.000Z

Þraut 1

Þegar ég kom inn í fjós í morgun sá ég að þar var allt fullt af músum. Grýla verður alveg snarbrjáluð ef hún sér mýs svo ég hleypti 6 köttum inn og þeir voru bara 6 mínútur að veiða 6 mýs! Hvað skyldi þá þurfa marga ketti til að veiða 10 mýs á 10 mínútum?

Jæja allir mínir kláru vinir þá er að setja heilasellurnar í gang því þrautir dagsins eru að birtast hérna.

Ef þú hefur ekkert að gera í lyftu ..

2004-12-10T13:44:00.000Z

Hermdu eftir kappakstursbíl í hvert skipti sem einhver kemur inn í lyftuna. Hermdu svo eftir sírenum pegar einhver fer út úr henni.
Snýttu þér og sýndu hinum í lyftunni vasaklútinn.
Grettu þig um leið og þú lemur þig í höfuðið. Muldraðu svo: "Æ, þegiði þarna öll. ÞEGIÐI!"
Reyndu ad selja einhverjum smákökur í lyftunni.
Vaggadu þér í takt vid lyftuna. Láttu þig svo rekast í vegginn og hnígdu á gólfid.
Rakaðu þig.
Opnaðu rifu á skjalatöskuna þína eða handtösku, kíktu þar inn og hvíslaðu nægilega hátt til ad hinir heyri: "Ertu med nóg loft þarna inni?"
Stattu þögul(l) og hreyfingarlaus í horni lyftunnar með andlitid upp ad vegg.
Þegar lyftan er ad nema staðar á hæðinni þar sem þú ætlar út, taktu þá æðiskast og reyndu af alefli ad opna dyrnar med höndunum. Vertu svo vandræðalegur á svipinn þegar dyrnar opnast af sjálfu sér.
Halladu þér upp ad næsta manni eda konu og hvíslaðu: "Bókasafnslöggan er á leiðinni!"
Heilsaðu öllum innilega med handabandi sem koma inn í lyftuna. Biddu þá um ad kalla þig Admírál.
Klóraðu þér viðstöðulaust og hóstaðu ofsalega á meðan. Geiflaðu svo vörunum og láttu sem ad þú sért ad umbreytast í apa.
Gerðu jógaæfingar.
Starðu á einhvern í lyftunni, glottu fáránlega og segdu svo hátt: "Ég er í nýjum sokkum!"
Dreifðu áróðursbæklingum frá Vottum Jehóva.
Mjálmaðu af og til. Geltu svo illilega og leiktu kött sem verið er ad murka líftóruna úr.
Segðu hinum farþegunum ad þú þorir ad veðja ad þú komir heilli krónu fyrir inní nefinu á þér.
Grettu þig og muldraðu í hálfum hljóðum: "Ah, mér er svo mál, mér er svo mál!" Svo skaltu stynja, líta vandrædalega í kringum þig og segja: "Úps!"
Sýndu hinum farþegunum sár sem þú hefur fengið og spurðu þá hvort þeir haldi ad það sé nokkuð byrjað ad grafa í pví.
Syngdu "það er leikur ad læra" á meðan þú ýtir stjórnlaust á takkana.
Æptu "í fallhlífarnar!" í hvert skipti sem lyftan fer niður á við.
Vertu med kælitösku sem á stendur stórum stöfum: "Mannshöfuð".
Starðu á einhvern í lyftunni í smá stund, og segðu síðan: "þú ert einn af ÞEIM!" Færðu þig svo eins langt frá viðkomandi og þú getur.
Þegar lyftan fer upp, taktu þá fram blokkflautu og spilaðu sálminn "Hærra, minn Guð, til þín".
Ropaðu. Segðu sídan: "Ahhh...þetta var gott!"
Vertu med leikbrúðu og spurðu farþegana "med búktali" hvort þú megir ýta á takkana fyrir þá.
Æddu inn í lyftuna rennandi blaut(ur) í baðslopp og med handklæði um höfuðið. Hristu höfuðið og muldradu eitthvað um það að eiginkonur/eiginmenn þurfi alltaf ad koma á versta tíma.
Reyndu ad fá hitt fólkid til ad syngja med þér "Meistari Jakob" í keðjusöng.
Þegar þögn ríkir í lyftunni, líttu þá í kringum þig og spurdu einhvern: "Var þetta bíp-tækid þitt?"
Segdu "Ding!" á hverri hæd.
Syngdu hástöfum. Berdu þér svo á brjóst og líktu eftir þokulúdri.
Segðu: "Hvernig ætli þessi virki?" og ýttu á rauda hnappinn.
Komdu med hlustunarpípu. Hlustaðu á veggi lyftunnar.
Teiknaðu ferhyrning med krít á lyftugólfið. Tilkynntu hinum ad innan hans sé "þitt svæði".
Komdu med stól.
Fáðu þér bita af samloku og segðu svo vid einhvern í lyftunni: "Vi´tu sjá hva' é e me' í mu''i' um á mé'?"
Blástu sápukúlur.
Segðu med djöfullegri röddu: "Grrr! Betri líkama! Ég verd ad finna mér betri líkama!"
Vertu med teppi og haltu daudahaldi í það. Breiddu það svo yfir höfuð þitt þegar hinir horfa á þig.
Hermdu eftir sprengju í hvert sinn sem einhver ytir á takka.
Vertu med sólgleraugu sem á stendur "Röntgengleraugu". Horfdu svo stíft á fólkid í lyftunni og glottu dónalega. Blístraðu.
Starðu á þumalputtann á þér og segðu: "Svei mér þá... hann er ad stækka."
Ef einhver kemur óvart vid þig, láttu sem þér bregði ofboðslega og öskraðu af öllum lífs og sálarkröftum: "Snertu mig ekki! Snertu mig ekki!"
Komdu med vatnsbyssu og sprautadu á skó hinna í lyftunni.
Burstaðu ósynilegar pöddur af handleggjum þínum og gargaðu: "Óged! Óged! Takið þessi ógeð af mér!"
Hlæðu gedveikislega í nokkrar sekúndur. Stoppaðu svo skyndilega og horfðu á hitt fólkid í lyftunni eins og þad sé eitthvad skrýtid.
Taktu upp merkipenna og teiknaðu skripamyndir af hinum farþegunum á lyftuveggina.
Þegar lyftan fer upp, hoppadu þá eins hátt og þú getur. Lentu svo med miklum dynk. Endurtaktu þetta nokkrum sinnum og öskradu: "Niður! Fjandinn hafi það, ég sagdi NIðUR!"
Skjóttu upp kryppu í einu horninu og urraðu ógnandi á þá sem koma inn í lyftuna.
Fitjaðu upp á nefið og þefaðu út í loftid nokkrum sinnum. Lyktaðu svo varlega af manneskjunni sem stendur næst þér. Grettu þig síðan og færðu þig eins langt frá og þú getur

Frítt niðurhal...

2004-12-05T18:39:00.000Z

Jólabónus TSC á Grundarfirði er frítt niðurhal erlendis frá þannig nú er maður að fara í gegnum allt sem manni gæti hugsanlega langað í.

Reyndar langar mig ennþá meira í nýja fartölvu svo ég geti sótt ennþá meiri hluti, hún er orðin dálítið hæg þessi elska sem ég er með núna.

En samkvæmt öllum fjárhagsáætlunum gengur það því miður ekki alveg upp núna þannig ef einhver lumar á góðri desember uppbót sem hann hefur ekkert að gera við tek ég við framlögum sem fyrst!! Sá heppni fær nokkrar rauðvíns og hvítvínsflöskur í kaupbæti þar sem ég vann vínpottinn í vinnunni á föstudaginn og hef ekkert að gera við það þar sem ég drekk ekki slíkar veigar.

Þessi nýja tenging er alveg að þrælvirka, bara gaman að fikta á netinu t.d. þegar ég pósta einhverju þá tekur það ekki sekúntu að publisha blogginu bara fúmm komið.

Eins og er er ég að bæta við námsvefinn minn í algebru þannig að hann verði eitthvað sem ég er virkilega stolt af, núna er ég bara stolt, ekki virkilega stolt :)

Eins er ég að fikta í jólasíðunni minni, (þar sem ég á að vera að læra fyrir próf) er ennþá að berjast við að láta snjóa á síðunni minni.

En ætli það sé ekki best að halda áfram svo að allt klárist hjá manni.

Speedy Gonzales!!

2004-12-03T15:17:00.000Z

Jessss.........
Nú er ég loksins komin með stöðuga tengingu svo að ég er í óða önn að laga og uppfæra allar síður sem ég vildi fikta meira við.

Er að setja inn fleiri myndir og gera allt voða sætt :)

Ég var líka að prófa Wiki kerfið sem mér finnst mjög sniðugt, það virðist því miður alltaf eitthvað gleymast þegar maður er svona á síðasta sperettinum í skólanum. Það eru tvær greinar sem ég gleymdi barasta að setja inn á bloggið líka, þ.e. setti fréttaveturnar inn á heimasíðuna mína en þær rötuðu ekki hingað fyrr en nú. En það verður þá bara bætt úr því.

Wiki er alveg stórsniðugt fyrirbæri, ég er t.d. núna búin að setja inn á heimasíðuna og fannst það einfalt og þægilegt, þ.e. þegar "þorið" fyrir því að prófa var búið að safnast upp í tvo daga. Einhverra hluta vegna er maður mjög ragur við að setja inn á svona alfræðiorðasafn sem aðrir (ekki bara vinir) geta skoðað. Wiki er sumsé tölvubúnaður sem gerir fólki kleift að búa til og breyta netsíðum. Þar er hægt að búa til safn síða sem fólk setur inn fróðleik sinn. Kosturinn við þetta er hversu lifandi vinnan verður, þar ertu komin með ýmis sjónarhorn á margvísleg fyrirbæri. Ókosturinn er hins vegar að erfitt er að hafa einhverja heildaryfirsýn, óprúttnir aðilar geta auðveldlega skemmt fyrir með dónaskap og leiðindum. En hins vegar er það ókostur sem maður verður að taka með vara og vona að flestir hafi að bera þroska og kurteisi til að skemma ekki. :)

Vefurinn loksins tilbúinn (hér um bil)

2004-12-01T22:16:00.000Z

Jæja eins og alltaf að þá einhvern veginn verða hlutirnir miklu stærri en maður ætlar, ég t.d. uppgötvaði að í raun gerði ég öll 3 valverkefnin, þ.e. námsvef, aðra stuttmynd og skólaheimsókn. En meira er betra í þessu tilfelli held ég.

Lota 1
Vefleiðangur
Vefrallý

Lota 2
Tæknisaga
Skilasíðan
Námsefni (misskildi verkefnið svolítið, svo ég á eftir að fullvinna þessa síðu, núna er hún komin)
Námsefni2
Portfolio á vef (átti víst að setja þetta í bloggið en það endaði á heimasíðunni)
Ferilskrá
Skil á einni vefsíðu á ensku
Skil á vefsíðu með dæmum um myndvinnslu
Fréttaveitur( RSS) (sama hér, átti að setja á blogg)
Upplýsingatækni í skólum (minn skóli)
Margmiðlun
Margmiðlun af bloggi

Lota 3
Movie maker
Örkennsla (glærur)

Lota 4
Producer verkefni
Hot potatoe spurningar og eyðufyllingar
Tenglar

Lota 5
Námsvefur (kemur innan skamms, óx mér aðeins um höfuð en er kominn núna)

Lota 6
Wiki
Prófanir (umfjöllun) og svo þrjár prufusíður :)
prófanir mínar (síða)
photostory 3
Jólasíða

Að lokum...

2004-12-01T21:22:00.000Z

Það sem ég hef lært og verið að föndra við í Upplýsingatækninni í vetur

Maður er alltaf að verða klárari og klárari á Frontpage og hérna má sjá afrekstur þeirrar vinnu minnar sem er búin að vera fikt í bak og fyrir, vefurinn minn, skólastarfið, algebra, 7.GG og það má kannski bæta við svona smá fikti frá mér á þessum tveimur síðum, hér er prófunarsíðan með öllu dótinu og svo þessi umfjöllun og svo jólasíðan

Þrátt fyrir að erfitt sé að gera upp á milli forrita þá eru í uppáhaldi hjá mér þessa dagana forritin Movie maker og Photo story frá Microsoft. Hér má sjá þessar prófanir mínar.

Bloggsíðan er alltaf að taka breytingum og fleiri og fleiri fídusar að bætast við, s.s. dagatalið, Flickr tíðarandarboxið, ég var búin að setja inn bæði blaðurbox (chatterbox, sem virkar líkt og comments), bloggrúllu (bloglines) en fannst það svo ofsaleg romsa að ég ætla aðeins að bíða með hana í bili. RSS fréttaveiturnar komu sterkar inn í lokin, verst hvað þetta fólk sem er í kringum mig er ,,ótæknilega” sinnað

Um leið og ég hef tíma verður gomsu og romsu af prófum og könnunum uppfært á netinu í forritinu Hot potatoe sem er náttúrulega bara snilld (af því sem ég hef prófað þ.e.) Það er með því leiðinlegra sem ég geri í kennarastarfinu er að fara yfir hefðbundin íslenskupróf. Þannig ég bíð spennt eftir að fá fartölvuverið og tímann J

Producerinn var einstaklega sniðugur og skemmtileg viðbót í kennslu, nú er bara að bíða eftir að maður verði ríkur og geti keypt sér bæði stafræna myndavél og vídeóupptökuvél J

PHDD spjallforritið sem var kynnt í upphafi námskeiðisins (sem ég setti alveg heil 3 skilaboð á) var mjög gott upphaf/æfing þar sem svo margir vefir bjóða upp á slíkt umhverfi sem maður hefur tekið þátt í. Svo Salvör þarf að taka á sig þá ábyrgð að maður byrjaði að tjá sig einstaklega mikið á hinum ýmsu vefjum

Myndvinnsluforritin sem ég hef unnið með þetta árið eru orðin nokkur, þar á meðal, Irfanview, Adobe photoshop 7, HP image editor, og að lokum uppáhaldið mitt Photodraw frá Microsoft. Einnig vann ég svolítið í Flickr en komst þó ekki alveg upp á lag með það, jah eða hafði bara ekki nóg af myndum frá mér til að hlaða inn, satt best að segja.

Þá held ég að megnið sé upptalið, ég er örugglega að gleyma einhverju, en ég bendi á ePortfolioið mitt sem ég vann í Upplýsingatækni og skólastarf, sem er að fá hæstu einkunn hjá mér hvað varðar námskeið. Tel reyndar að þetta ætti að vera 3 eininga fag þar sem tíminn sem fer í það er verulegur, sérstaklega þegar maður er að pjattast svona ógurlega inn á milli.
Takk fyrir veturinn.

Nýtt dót

2004-11-28T18:41:00.000Z

Jæja nú ættuð þið að getað fylgst með mér nokk vel. Er búin að setja inn dagatal sem ég fékk á Bravenet.com þar er hægt að fá heilan helling af dóti til að gera bloggið sem skemmtilegast.

Pirr dagsins - Tæknin...

2004-11-28T17:03:00.000Z

... er endalaust að stríða mér þessar síðustu vikur.
Ég er ekki búin að hafa netsamband núna undanfarnar tvær vikur nema rétt í mýflugumynd sem það dettur inn öðru hvoru. Þetta er að verða einstaklega pirrandi því þegar maður er í fjarnámi er nauðsynlegt fyrir mann að hafa stöðugt og traust samband.

Ég hélt að ég væri að gera svo agalega góða hluti með að fá mér örbylgjusamband. Sem er að verða hinn mesti galli, held það hefði verið skárra að vera bara með gamla góða símhringisambandið.

En nú er von á úrbót þar sem ég ætla að fá mér vdsl (sem er svipað adsl, nema mun öflugara) en það hefur orðið bið á því, þrátt fyrir loforð að þetta tæki "enga stund" þessi engin stund er að verða lengri en rapid prógramið mitt góða.

Fiktum og fiktum

2004-11-21T02:23:00.000Z

Núna mætti segja mér að það séu jólin hjá fikturunum í faginu býst ég við.

Ég var að reyna að vera rosalega klár og sækja mér utanaðkomandi template, en ég komst ekki lengra en að fá sama útlit, í bili a.m.k. Ég er engan veginn hætt skal ég láta ykkur vita, held þó að mig vanti betri þekkingu á html máli. Prufan er hér en ég er búin að skrifa 2 pósta sem skila sér ekkert þannig það eru víst hellingur af vitleysu hjá mér, þess þá heldur get ég ekki hlaðið upp myndunum sem ég þarf að hlaða upp til að klára dæmið.

Ég er líka búin að vera að leika mér með ýmsa fídusa í Frontpage og leika mér meira í því forriti, þ.e. setja inn web components, ég ákvað að skella því bara öllu saman á eina síðu, sem er nú bara ferlega ljót fyrir utan sæta umgjörð. En skoðið hana endilega. http://nemendur.khi.is/gudfgudj/skolastarf/new_page_1.htm

Nú er illt í efni.....

2004-11-15T22:29:00.000Z

Ekkert kenna má..... ekki er heldur frýnilegt að horfa áááháhá...

Jæja það er ekki hægt að segja annað en að manni sé búið að líða virkilega illa í dag. Það var alveg hellingur sem ég ætlaði að fikta áfram og gera síðuna enn sætari hjá mér. En maður er búin að vera hálfdofinn og ónýtur.
Þetta frábæra starf sem ég hef hingað til dýrkað út af lífinu er ekki alveg það starf sem að maður er tilbúinn að stunda héðan í frá. Ekki miðað við þorra samfélagsins sem telur að maður sé óhæft úrhrak sem nennir ekki að vinna.

En svona er Ísland í dag, maður verður bara að bíta í það súra og halda sínu striki, ekki ætla ég að láta þessar óánægjuraddir með vinnu mína eyðileggja fyrir mér síðasta árið.

Ég er undanfarið búin að vera að vinna að vefnum mínum, þar sem að ég hafði ekki aðgang að frontpage-tengdri tölvu fyrr en fyrir 2 vikum, reyndar var Salvör svo hugulsöm að aðstoða mig við að birta ( publisha) vefnum fyrir mig í október. Svo fékk ég vægt áfall, tíminn er búinn að fljúga áfram og ég ætlaði að skrifa hér amk annan hvorn dag til að segja hvað ég væri að gera. En því miður hefur verið skortur á því, í raun þá geri ég hlutina (í tölvunni) og velti svo fyrir mér eftir á hvernig ég fór eiginlega að því, maður bara fiktar þangað til ásættanlegum árangri hefur verið náð.

Ég var að vinna að örkennsluverkefninu mínu í síðustu viku, talið ætlaði aldrei að verða ásættanlegt þar sem það var alltaf of lágt, ég fiktaði og reyndi að hækka talið en eina sem gerðist var að t-in urðu hálf puðrukennd svo ég ákvað að lægri hljóðstyrkur væri skárri en að puðra heila glærusýningu. Afreksturinn getið þið séð/heyrt hér.

Annað sem ég hef verið að fikta mig áfram með og prófa er hot potatoe forritið sem er alveg þræl skemmtilegt og ég býst fastlega við að prófa í kennslu, (ef tími gefst). Það eru bara komin tvö sýnidæmi en fleiri eru á leiðinni.

Annað sem ég hef verið að leika mér að eru ýmsir fídusar í frontpage, s.s. web components, top 10 list, textabox o.fl. Ég er ekki alveg tilbúin að sýna þá síðu strax þar sem hún er nú fremur óskipulögð og ljót.

Wiki forritið sem mér finnst mjög spennandi verður að bíða til morgundagsins.

Rapid program

2004-11-08T01:03:00.000Z

Tíminn er alveg ótrúlega fljótur að líða, áður en maður veit af verða komin jól.
Eins og er er ég að bíða eftir Rapid prógramminu á þvottavélinni sem ég hafið talið vera "snöggt" er að koma í ljós að er bara alls ekkert svo Rapid eða þá að ég hafi bara misskilið svona hroðalega og þetta Rapid þýði bara eitthvað allt annað.
Ég uppgötvaði þegar ég var að fara að skríða upp í rúm að einhvernveginn hafði mér tekist að skíta út allar buxurnar mínar svo ég þurfti að henda því í vélina og bíða eftir að koma því á ofninn. Núna rúmlega 1 og hálfum tíma seinna er fjandans vélin enn að.
Sem er svo sem ágætt í sjálfu sér því þá hef ég lengri tíma til að dútlast í heimaprófinu sem er í upplýsingatækninni hjá okkur núna.
Það væri reyndar ágætt ef öll "Rapid" prógröm hjá manni væru svona lengi að líða, að maður hefði allan tíma í heimi til að klára sitt. Mikið rosalega vildi ég t.d. að ég hefði endalausan tíma til að sinna náminu vel. Reyndar er maður búinn að hafa rúman tíma núna undanfarið, fyrir utan síðustu viku. Sem stefnir svo allt í rúman tíma aftur á þriðjudaginn.
En eins og er lítur út fyrir að þetta rapid prógram sé að klárast svo ég verð að henda buxunum á ofninn.

Margmiðlun í skólum

2004-10-16T16:53:00.000Z

Hér eigum við að segja nokkur orð um hvaða möguleika við sjáum í margmiðlun í skólum í framtíðinni.

Ég held að það sé engin ný sannindi hjá mér að segja að skólar nú til dags eru barn síns tíma. Við erum enn að nota svo til sömu kennslutækni og var gert fyrir 100 árum. Þ.e. fyrirlestraformið að sjálfsögðu er það þó sem betur fer með aðeins breyttum áherslum en þó ekki mikið.
Margmiðlun gefur okkur tækifæri á svo miklu meiri fjölbreytileika og er meira í takt við samtímann sem við lifum í.
Nú þykir það t.d. sjálfsagt að flest allir eiga ferðatölvu og mæti með hana í skólann. Áður en langt um líður verður það líka sjálfsagt hjálpartæki í grunnskólum landsins.
Þá sér maður fyrir sér að nemendur fá verkefni frá kennurum sem þeir sækja á netið, vinna verkefnin í tölvunni og skila aftur í tölvutækuformi, náttúruvænt og þægilegt fyrir alla aðila.
Með nýrri og öflugri tölvu- og netvæðungu geta kennarar t.d. talsett glærur sínar og sýnt þær og fylgst betur með nemendum hvernig þau eru að bregðast við hvað er ábótavant, hvað þarf að útskýra betur og haft það til taks þegar næsti hópur þarf að fara yfir sömu hluti.
Einnig gefur þetta færi á fjölbreyttari úrvinnslu nemenda. Þeir fá fjölbreyttari verkefni sem miða við þarfir hvers og eins ásamt því að fá þjálfun í að vinna raunveruleg verkefni sem nýtast þeim betur síðar.
Allt þetta krefst þó mikillar tæknivæðingar í skólum, það þarf að vera sjálfsagður hluti að hver og einn nemandi hafi aðgang að tölvuveri þegar honum hentar. Ekki eins og staðreyndin er í dag, að einungis er 1-2 kennslustundir á viku sem nemendur hafa aðgang að tölvum.

Hvað er verið að gera?

2004-10-16T16:45:00.000Z

Jæja enn og aftur tengt skólanum. Nú er ég að leggja lokahönd á vefinn minn. Stór hluti af honum er kominn á vefinn og hægt að skoða hér.
Ég er búin að vera í þónokkrum vandræðum þar sem ég hef ekki haft nettengingu á tölvuna mína. En það er allt á batavegi þar sem stór hluti er kominn inn á vefinn.
Stuttmyndin er tilbúin, átti að vera eitthvað smá verk bara svona til að kynna manni hvernig Movie maker virkar, en þegar ég vistaði hann var það 19 mb sem er kannski aðeins of stórt þar sem verkefnið átti bara að vera 1 mb humm humm þá þarf ég að klippa til þessa snilli mína.

Einnig erum við að vinna að örkennsluverkefni sem eru nokkrar glærur sem við komum svo til með að setja tal inn á, sem fer inn á vefinn hjá mér á mánudaginn þar sem ég var svo sniðug að gleyma þeim heima þegar ég fór upp í skóla að uppfæra.
Ég telað þetta sé frábær leið til að láta krakkana vinna ýmis verkefni tengd skólanum, ég kenni 7.bekk og í fyrra gerðum við stuttmynd fyrir árshátíðina og þeim fannst það frábært.

Aðrar síður sem við erum að vinna að er ferilskrá, námsefni, ensk síða um okkur, margmiðlununar möguleika í skólum í framtíðinni, vefleiðangur og vefrallý, portfólíos, eða framfaramöppur þessar síður er flestallar hægt að finna á vefnum mínum eða eru rétt handan hornsins og verða endanlega uppfærðar og lagaðar til í vikunni.

Verkefnin hrannast upp

2004-10-12T16:36:00.000Z

Jæja nú eru verkefnin smátt og smátt að hrannast upp hjá manni í kennó, en þau eru öll af hinu góða svo ég þarf ekki að grípa til áðurnefnda afsakana. Það er hvort eð er allt svo hreint hérna. Sérstaklega eru verkefnin skemmtileg í Upplýsingatækninni því þar fær maður að fikta svo mikið. Eins og er er ég að leggja l0kahönd á vefinn minn, get reyndar ekki enn póstað honum inn á síðuna, þar sem ég hef ekki aðgang að tölvutengingu í tölvunni minni.
Ætli maður endi ekki á að skreppa bara vestur til að redda þessu. Enda virðist ekkert vera á leiðinni að semja neitt, en ég er farin að sakna rúmsins míns alveg hroðalega.
Núna þessa dagana erum við að vinna að stuttmynd í forritinu Movie maker sem er bara virkilega flott forrit, hægt að gera svo margt með það. Þannig þið verðið bara að bíða spennt eftir að geta skoðað stuttmyndina mína. Gott ef ég sé ekki óskarinn í framundan hjá mér.

Hvernig á að haga sér í verkfalli!!

2004-10-04T01:06:00.000Z

Skríddu inn í pínulítið herbergi, læstu dyrunum og gættu þess að tala ekki við neinn!!!

Eitt það skemmtilegasta við að vera kennari er að það hafa svo margir áhuga á að ræða starfið, það hafa allir skoðanir á skólamálum og allir tilbúnir að ræða það af mikilli innlifun...

Þetta tel ég vera hið besta mál, svo kemur verkfall!!!! Þá er það skemmtilegasta hversu margir eru tilbúnir að segja mér hvað ég vinn mikið/lítið.

Ég er alltaf búin að vinna kl. 13:30 nema á föstudögum þá er ég búin á hádegi
Ég er í mánuð í jólafrí
Ég er 3 mánuði í sumarfríi
Ég er alltaf í verkfalli
Ég er bara á helvíti góðu kaupi miðað við vinnu

Og þetta tyggur fólk ofan í mig svona til að vera fullviss um að ég sé sammála því, tek reyndar fram að ekkert af þessu er satt, en það virðist ekki skipta öllu fólk veit betur og hristir jafnvel hausinn örlítið af vanþóknun að ég skuli nú ekki bara kinka kolli og loka munninum og vera þakklát fyrir þá peninga sem ég fæ.
Svona er Ísland í dag :)

Tæknin nú til dags

2004-10-03T23:49:00.000Z

....gerir alveg heilmikið fyrir mann. Ja reyndar bara alveg ótrúlega mikið, neeeeeeema þegar hún fer að stríða manni og virkar ekki. Eins og fjandans Webct er að gera núna. Þá verður maður algjörlega handalaus með öllu.
Reyndar bíð ég spennt eftir að tæknin verði það öflug að hægt sé að uppfæra heilann örlítið, mér veitti virkilega ekki að því að stækka minniskubbinn örlítið, eða að "rífresha" hann svo hann virki nú kannski örlítið hraðar, ég var fullviss að ég væri nú búin að vera ótrúlega dugleg og pósta hér inn heilum hellingi og það bara fyrir skömmu. En svo sé ég mér til mikils ama að það eru rúmlega 10 dagar síðan.
Sem er náttúrulega bara skömm að fyrir mína dyggu áhangendur (alla 4) því biðst ég forláts, en ber við skort á nýrri tækni ;)
Nema hvað ég er búin að sitja sveitt við að útbúa síðurnar mínar (og þær eru sko flottar) í upplýsingatækninni en svo get ég ekki publishað þeim fyrr en ég fer vestur, því maður er orðinn svo rosalega flottur á tækninni að maður er bara með örbylgjutengingu.
Þannig því miður verður enn smá bið í að vefurinn minn verði tilbúinn.

Þegar að ég þarf að læra

2004-09-19T21:25:00.000Z

þá byrja ég á því að taka til á skrifborðinu
Svo horfi ég örlítið á sjónvarpið
Svo tek ég aftur til á skrifborðinu af því það varð svo mikið drasl á því að breiða út skólabækurnar
Svo þarf ég að hella upp á kaffi
Svo þarf ég nauðsynlega að hringja eitthvert
Svo þarf ég að hella nýju kaffi í bollann
þá er ég klár í að læra, en tek þá eftir þvotti (3 sokkum, geta aldrei verið í sléttir tölu) sem nauðsynlega þarf að setja í vélina
nú fyrst ég er komin inn á bað er alveg eins gott að þrífa þar líka
þá tek ég þvottinn af ofninum og fer inn í svefnherbergi og geng frá þvottinum
og fyrst ég er byrjuð að ganga frá þvottinum í skápinn sem er ein óreiða þyrfti ég eiginlega að taka hann í gegn
Endurraða öllu í fataskápnum
þá er kaffið orðið kalt svo ég þarf að fá mér nýtt
jah ég er ekki búin að skrifa á bloggið í smátíma núna svo það er best ég skelli aðeins inn á það
svo er að byrja svo skemmtilegur fræðsluþáttur í sjónvarpinu að ég held ég verði nú bara að fylgjast með honum

Þar sem að þátturinn er að byrja núna er best að fyljgast með..... kannast einhver við þetta??

Vefleiðangur

2004-09-15T22:50:00.000Z

Jæja allt á fullu í skólanum. Hér kemur svo uppkastið af vefleiðangir mínum. Ég vil taka fram að þetta er aðeins uppkast.

Þessi vefleiðangur er farin til að kynnast ævi og starfi Snorra Sturlusonar. Hann er ætlaður nemendum í 6. bekk í grunnskóla

Kynning:
Hver var Snorri Sturluson? Af hverju þekkjum við til nafn hans tæplega 800 árum eftir að hann dó? Í þessum leiðangri átt þú að gerast rannsóknarmaður og kynna þér ævi þessa merka manns.

Verkefni:
Verkefni ykkar er að rannsaka ævi Snorra Sturlusonar, þið eigið að passa upp á allar niðurstöður ykkar og kynna fyrir samnemendum ykkar hverju þið komust að. Þið hafið um þrjá kosti að velja hvernig þið skilið verkefninu:
Í dagblaðastíl (þið búið til forsíðu og fyrirsagnir fyrir hverja frétt)
Á veggspjaldi (þið setjið upp veggspjald þar sem allar helstu upplýsingar koma fram)
Í ritgerð (þið skrifið ritgerð þar sem þið tiltakið öll þau atriði sem þurfa að koma fram)

Ferli
Í þessu verkefni megið þið velja hvort þið vinnið þetta ein eða 2 og 2 saman.
Þú skoðar vel þessa síðu og lest fyrirmælin
Þú leitar eftir upplýsingum sem hér birtast
Þú tekur saman niðurstöður þínar, en gættu þess að afrita ekki bara textann, það er ritstuldur.
Þegar þú hefur skráð niðurstöður þínar niður skipulega þá byrjarðu að vinna úr þeim
Þið ákveðið í hvaða formi þið viljið skila verkefninu
O.fl.

Bjargir
Hér er góður vefur til að skoða í upphafi verkefnisins til að gefa ykkur jafnvel betri yfirsín yfir hversu mikið er hægt að finna um Snorra
Hér er mjög góður vefur þar sem teknar hafa verið saman helstu upplýsingar um Snorra http://www.fva.is/~harpa/forn/snorri/snorris.html
Hérna finnið þið ágætis glærusýningu sem kynnir líf Snorra og ritstörf hans http://www.ismennt.is/not/lybaek/bokasafn/snorri/SnorriSturluson.pps
Hér sjáið þið ýmsar myndir og yfirlit frá Reykholti
Snorrastofa er upplýsingamiðill um ýmislegt er viðkemur Snorra Sturlusyni, það er bæði hægt að sjá síðuna á íslensku og ensku.
Hér eru nokkrar af vísum Snorra http://www.hi.is/~eybjorn/ugm/skindex/snst4.html
Höggmynd af Snorra, og fleiri myndir
Hér er skemmtilegt vefpróf til að æfa þekkingu ykkar á Snorra

Mat
Verkefnið verður metið eftir virkni og þátttöku ykkar einnig sjáið þið hér (kemur síðar) matsblað sem kennari mun fara eftir þegar hann metur verkefnið

Niðurstöður
Hvað hafið þið lært á þessu? Af hverju haldið þið að Snorri Sturluson sé talinn svona merkilegur?

Vefrallý

2004-09-15T18:37:00.000Z

Hérna er uppkast að vefrallý sem ég er að vinna fyrir Upplýsingatækni og skólastarf

Verkefni ætlað fyrir 7. bekk í íslensku

Höfundakynning um Halldór Laxness í tengslum við sögur sem nemendur lesa.

Hér finnið þið efnið sem þið notið

http://www.mbl.is/serefni/laxness/
http://www.fva.is/harpa/kristnihald/halldorlaxness.html
http://www.mbl.is/serefni/laxness/skaldskapur.html
http://www.touristguide.is/html/body_halldor_laxness.html

Skoðið þessar síður og svarið því næst spurningunum í stílabókina ykkar
Þetta verkefni á ekki að taka meiri tíma en 20-30 mínútur

Hvenær fæddist Halldór Laxness?
Hvað heitir Halldór Laxness fullu nafni, og hvernig stendur á þessari nafngift hjá honum? (útskýrið ítarlega).
Hvað á hann mörg börn og hvað heita þau?
Hvað heitir eftirlifandi kona hans?
Var skólaganga Halldórs löng, hvers vegna? Hvers vegna ekki?
Hvað var Halldór gamall þegar hann skrifaði sína fyrstu bók og hvað heitir hún?
Hverra trúar var Halldór og hvaða nafn tók hann upp í kjölfarið?
Nefnið a.m.k. 5 staði sem Halldór ferðaðist til
Hvar á Íslandi átti Halldór fast heimili?
Hvað hafa bækur Halldórs verið þýddar á mörg tungumál?
Fékk Halldór einhver verðlaun? Ef svo, hvaða verðlaun og hvenær?
Hvers konar verk hefur Halldór Laxness látið frá sér?
Nefnið 5 af frægustu sögum Halldórs?
Hvenar lést Halldór Laxness?
Hvers vegna haldið þið að Halldór Laxness hafi orðið svona frægur eins og raun ber vitni?

Þetta er óklárað verkefni endilega skellið ykkur í startholurnar og takið tímann ;)

Gervineglur og glamúr

2004-09-05T22:13:00.000Z

Guðfinna er pæja!!!

Þar sem ég hef löngum talið mér trú um að langar og fagrar neglur geri litla og feita putta fallegri á ég það til öðru hvoru að fá mér gervineglur. Nema hvað ég storma inn á naglastofuna og fæ þessar líka fallegu klær og finnst mér ég nú vera heimsins mesta pæja þar sem ég var nú líka svoltið brún eftir sumarið.

Nema hvað ég skunda heim og er að byrja undirbúning fyrir kennslu, þar kemur að fyrstu hindruninni, ég þarf að búa til glósur fyrir samfélagsfræðina. Ég get frætt ykkur hér og nú að reyna að pikka á lyklaborð með allt of langar klær er alveg ótrúlega tímafrekt og leiðinlegt atferli. Ekkert nema vitleysur og klærnar renna út um allt.

Þannig gelludagarnir með gervineglurnar voru fáir núna þetta skiptið. Hélt reyndar út í heilar 2 vikur þangað til verkefnin í skólanum voru farin að hlaðast upp og commentin biðu eftir að vera svarað. Því voru neglurnar styttar niður í viðráðanlega lengd með athöfn hér í kvöld. Í þessari sérstöku athöfn þar sem pæjan var brytjuð niður með naglaklippum og naglaþjöl ákvað ég nú að ég væri ekki alslæm að ég væri bara ágæt "just as I am". ;)

Að komast í gang

2004-09-05T21:16:00.000Z

Það er alveg ótrúlegt hvað maður getur stundum verið lengi að komast í gang. En svo þegar liggur við þá trekkja allar vélar sig í gang og eitthvað gerist.
Það er að minnsta kosti mín skýring á þessari haustbyrjun hjá mér.

Skólinn, KHÍ, krefst þess af okkur. Sem er að sjálfsögðu ekkert óeðlileg ósk að heilinn fari að virka með de samme. En heilinn sjálfur virðist vera á öðru máli. Hann er enn fastur í sumarfríinu sínu og telur sér stórlega ógnað með átroðningi orða og hugsana sem krefjast fleiri en tveggja rása til framkvæmdar.

Nú fara reyndar að skella á okkur fleiri fleiri verkefni sem krefjast úrlausnar og full heilastarfsemi er æskileg. Þannig þá er bara að rífa af sér sumarslenið og komast í gang.

Reyndar er stundin komin því á morgun er foreldrafundur í skólanum hjá mér og ekki stendur maður bara og stamar frammi fyrir öllum.

Mér kvíður þó reyndar aðeins fyrir kynningu minni á stærðfræðiverkefninu okkar sem við keyrðum af stað núna í upphafi árs. En það gengur vonandi afskaplega vel þar sem ég er svo sérstaklega vel máli farin og útskýri allt svo vel hóhó ;)

Myndskilaboð

2004-08-21T13:02:00.000Z

MyndskilaboÃ°, originally uploaded by Salvor.

Var að prófa þetta frá flikcr

Þú getur skoðað þetta sniðuga forrit flickr á þessari síðu

Upplýsingatækni og skólastarf

2004-08-21T12:37:00.000Z

Hér mun verða bætt ýmsu einstaklega skemmtilegu og sniðugu dóti sem tengist skólanum. Þá sérstaklega
Það fór þó aldrei svo að það yrði virkilega skemmtilegt að mæta í skólann. Sú var þó raunin þessa staðlotu, það var svo mikið af skemmtilegum áföngum sem ég er að mæta í. Þessi síða verður þó tileinkuð námskeiðinu Upplýsingatækni og skólastarfÞar sem ég er nú mætt í tíma læt ég þetta duga í bili svo ég taki vel eftir í tíma.

Hvað næst?

2004-08-12T18:56:00.000Z

Íslendingar og afrek þeirra eru mörg og mikil!
Að minnsta kosti finnst okkur það sjálfum. Um daginn var mikið látið af afreki konu nokkurrar sem synti yfir Breiðafjörðinn. Þetta eru um 60 km og allt gott um það að segja mikið afrek hjá henni blessuninni og farið í þágu góðs málefnis. Það sem fór ótrúlega í taugarnar á mér að manneskjan var varla búin að skríða í land þegar fréttamennirnir réðust að henni og spurðu: ,,Hvað næst?

Er aldrei hægt bara að fagna því sem hefur verið afrekað, þarf alltaf að vera eitthvað næst?

Ég á núna orðið íbúð (weeeeeeeeeeeeeeeeeee, jeij ég dugleg) en það fyndna við það er að ég skrifaði undir kaupsamninginn í gær, og strax er farið að ræða hversu lengi ég verði nú í þessari íbúð áður en ég fer að stækka við mig!!!
Er þetta eitthvað íslenskt fyrirbæri? Eða eitthvað sem er nauðsynlegt til að viðhalda hinu "frábæra" lífsgæðakapphlaupi.
Reyndar finnst mér þetta aldrei vera augljósara en þegar kemur að innstu málefnum okkar, þ.e. sambönd og rómantík:

Þú ert ein! Hvenar ætlarðu að finna karl?
Þú átt karl! Hvenar ætlið þið að koma með barn?
Þú átt eitt barn! Jæja á ekkert að fara að koma með annað?
Þú átt fullt af börnum! Hvernig er þetta með ykkur ætlið þið ekkert að fara að gifta ykkur??????

En nóg um það pirr ég ætla að njóta þess að eiga orðið íbúð, eftir því sem ég veit best verð ég í henni næstu 40 árin, ég á æðslegan bíl sem endist þangað til hann hrynur sökum elli og kötturinn er kominn til að vera.

Loksins fréttir

2004-08-06T00:28:00.000Z

Þar sem að ég er þess fullviss að fullt af fólki bíður stanslaust eftir fréttum frá mér ákvað ég að búa til eitthvað svona sniðugt. Þess þá heldur á þetta ekki á hættu að lenda í tölvuviðgerðarkörlum sem óvart eyða því.

Jæja helstu fréttir eru þá þessar:

Ég er um það bil að fara að leigja mína eigin íbúð af bankanum og verða þar af leiðandi 10 miljónum króna fátækari. Hins vegar er mikil skipulagning í gangi um að vera búin að finna karl fyrir þann 1. september 2006 (áhugasamir skilið inn umsókn með greiðslumati og sakaskrá).
Ég gerði ekkert um verslunarmannahelgina, var heima og horfði á einkabankann, rosalega gaman þegar það eru svona háar upphæðir inni á reikningnum.
Ég kem ekki til með að vinna aftur sem flokksstjóri í unglingavinnunni, eða afsakið vinnuskólanum eins og það heitir víst núna, ég get þó með sanni sagt að ég hafi prófað það og er þar með komin í hóp þúsunda einstaklinga sem það hafa prófað (þeir sem hafa prófað oftar en einu sinni, skál fyrir ykkur).
Skólinn er byrjaður aftur, eða svona í mínímynd a.m.k. það eru byrjuð námskeið svo maður er alveg á leiðinni að komast í gírinn........ einhvern tímann vonandi.